APA xəbər verir ki, Sumqayıt Ağır Cinayətlər Məhkəməsində hakim Nahid Mirzəyevin sədrliyi ilə keçirilən prosesdə hökm oxunub.
Hökmə əsasən, təqsirləndirilən Rathnayake Nuvan 15 il, Sedara Munasinghe 14 il 9 ay, Dinesh Geethackarige 15 il müddətinə azadlıqdan məhrum etmə cəzasına məhkum edilib.
Həmçinin, hökmə əsasən, onlar cəzalarını çəkdikdən sonra ölkədən məcburi çıxarılmalıdırlar.
Qeyd edək ki, hadisə 2022-ci ilin sentyabr ayında baş verib. Təqsirləndirilən şəxslər həmyerliləri olan 1996-cı il təvəllüdlü Pathira Dinuka Nishanthanın şikayəti əsasında tutulublar.
Sentyabrın 21-də gecə Şri-Lanka vətəndaşları -1980-ci il təvəllüdlü Rathnayake Nuvan, 2000-ci il təvəllüdlü Sedara Munasinghe və 1992-ci il təvəllüdlü Dinesh Geethackarige Dinuka Pathiranı Masazır qəsəbəsində evdə döyüblər. Daha sonra onlar həmin şəxsin 3 min dollarını, içində 1400 dollar olan kartını, 1 milyon rupi olan digər kartını və dəyəri 2 min dollar olan mobil telefonunu götürərək uzaqlaşıblar.
Dinuka Pathiranın şikayətindən sonra əməliyyat keçirilib və həmin şəxslər ölkədən çıxmaq istəyərkən hava limanında saxlanılıb.
Onlar Cinayət Məcəlləsinin 29,120.2.1, 29,120.2.4, 29,120.2.6 və 29,120.2.7-ci maddələri ilə ittiham olunub.