Naxçıvan Muxtar Respublikasının Səhiyyə Nazirliyi tərəfindən “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”na uyğun olaraq səhiyyə sistemində aparılan islahatlar çərçivəsində Ailə Sağlamlıq mərkəzlərində çalışan tibbi heyət üçün növbəti maarifləndirici təlim təşkil olunub.
Nazirliyin mətbuat xidmətindən AZƏRTAC-ın bölgə müxbirinə bildirilib ki, təlimin əsas məqsədi imtiyazlı dərman preparatlarının paylanması ilə bağlı qanunvericiliyin tələbləri, vətəndaşlarla ünsiyyət mədəniyyəti və bu sahədə tibbi personalın peşəkar bilik və bacarıqlarının artırılması olub. Tədbir zamanı iştirakçılara mövzu ilə bağlı geniş məlumat verilib, praktiki nümunələr əsasında mövcud hüquqi çərçivə izah edilib.
Həkim-endokrinoloq Aysel Dünyamalıyeva təlimdə imtiyazlı dərman vasitələrinin düzgün və şəffaf şəkildə paylanması qaydaları, eləcə də pasiyentlərlə səmərəli ünsiyyətin qurulması istiqamətində vacib tövsiyələr verib.
Maarifləndirici tədbirlərin gələcəkdə də davam etdirilməsi nəzərdə tutulur.