Bakı Dövlət Universiteti (BDU) Türkiyənin İstanbul şəhərində keçirilən Qlobal Dayanıqlı İnkişaf Konqresində Azərbaycan pavilyonunda öz stendi ilə təmsil olunur.
BDU-dan AZƏRTAC-a bildirilib ki, stenddə bu universitetin dayanıqlı inkişaf sahəsində həyata keçirdiyi təhsil və tədqiqat təşəbbüsləri, beynəlxalq əməkdaşlıq strategiyaları, yaşıl kampus təşəbbüsləri və iqlim dəyişikliklərinə uyğunlaşdırma ilə bağlı layihələri ziyarətçilərə təqdim olunur. Həmçinin BDU-nun BMT-nin Dayanıqlı İnkişaf Məqsədlərinə uyğun olaraq həyata keçirdiyi fəaliyyətlər, universitetin beynəlmiləlləşmə strategiyası çərçivəsində əldə etdiyi uğurlar və gələcək əməkdaşlıq imkanları barədə ətraflı məlumat verilir. Stend ətrafında interaktiv müzakirələr BDU-nun təcrübəsinin paylaşılması və yeni tərəfdaşlıqların qurulması baxımından əhəmiyyətli imkanlar yaradıb.
BDU-nun bu cür beynəlxalq tədbirlərdə iştirakı universitetin qlobal miqyasda tanınmasına, elmi əməkdaşlıqların genişlənməsinə və Azərbaycanın ali təhsil sektorunun beynəlxalq platformalarda layiqincə təmsil olunmasına mühüm töhfə verir.
Dörd gün davam edəcək bu mühüm beynəlxalq tədbir “Times Higher Education” reytinq agentliyi və Türkiyə Ali Təhsil Şurasının birgə təşəbbüsü ilə təşkil edilib. Konqres ali təhsil müəssisələri, tədqiqat mərkəzləri, dövlət qurumları və qeyri-hökumət təşkilatlarının BMT-nin Dayanıqlı İnkişaf Məqsədləri çərçivəsində apardıqları fəaliyyətləri müzakirə, qlobal əməkdaşlığı təşviq etmək və ortaq həll yollarını müəyyənləşdirmək üçün əhəmiyyətli platforma rolunu oynayır.