Naxçıvan Muxtar Respublikası Qida Təhlükəsizliyi Agentliyi üçün Dövlət Proqramı çərçivəsində ən müasir standartlara və beynəlxalq akkreditasiya tələblərinə cavab verən laboratoriya binasının tikintisi və onun mövcud resurslar nəzərə alınmaqla, müasir cihaz və avadanlıqlarla təchiz edilməsi nəzərdə tutulur.
AZƏRTAC-ın bölgə müxbiri xəbər verir ki, bunu jurnalistlərə açıqlamasında Naxçıvan Muxtar Respublikası Qida Təhlükəsizliyi Agentliyinin aparat rəhbəri Vasif Orucov deyib.
Onun sözlərinə görə, hazırda laboratoriya binasının tikintisinin layihələndirilməsi işləri aparılır. Bu məqsədlə satınalmalar sahəsində qanunvericiliyin tələblərinə uyğun olaraq tender keçirilib. Artıq qalib təchizatçı ilə müqavilə bağlanılıb. Layihənin icrasının 2027-ci ilin sonunadək yekunlaşdırılması proqnozlaşdırılır.
“Binada dörd istiqamətdə – qida, baytarlıq, fitosanitar və kompleks tədqiqatlar laboratoriyası fəaliyyət göstərəcək”, – deyə Vasif Orucov əlavə edib.