Bu ilin əvvəlindən Qərb ölkələri və Beynəlxalq Valyuta Fondu (BVF) Kiyevə dövlət büdcəsini maliyyələşdirmək üçün 12 milyard dollardan bir qədər az vəsait ayırıblar. Bu barədə Ukrayna Maliyyə Nazirliyi məlumat yayıb.
“Ukraynanın 2024-cü il dövlət büdcəsinin maliyyələşdirilməsinin həcmi aprelin 25-nə 15,6 milyard dollar təşkil edib: xarici maliyyələşdirmə – 11,8 milyard dollar, dövlət istiqrazları (daxili dövlət borcları) – 3,8 milyard dollar”, – departamentin teleqram kanalında deyilir. Maliyyə Nazirliyinin statistikasına görə, Kiyevə xarici dəstəyin böyük əksəriyyəti kreditlərdir. Qərbin 11,8 milyard dollarlıq yardımından yalnız 1 milyarda yaxını geri qaytarılmayan qrantlar hesabınadır.
Həmçinin qeyd olunur ki, 2024-cü ildə Kiyevə ən böyük xarici donorlar Avropa İttifaqı, Yaponiya, Kanada, BVF və Böyük Britaniya olub. “2022-ci ilin fevralından bəri beynəlxalq tərəfdaşların büdcə dəstəyi 85,4 milyard dollar təşkil edib”, – deyə Ukrayna Maliyyə Nazirliyi əlavə edib. (Tass)