Sözçü Karine Jean-Pierre bu sualı ABŞ Ədliyyə Nazirliyi və FTB-yə yönləndirib.
TASS/. Ağ Ev İranın Respublikaçı Donald Trampın seçki qərargahına kiberhücum etməsi versiyasını təsdiqləmir.
Ağ Evin mətbuat katibi Karine Jean-Pierre jurnalistlər üçün keçirdiyi növbəti brifinqdə deyib: “Mən İranın iştirakı ilə bağlı iddiaların doğruluğunu şərh etməyə hazır deyiləm”. Onun sözlərinə görə, bu sual ABŞ Ədliyyə Nazirliyinə və Federal Təhqiqat Bürosuna ünvanlanmalıdır.
Bundan əvvəl Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi də jurnalistlər üçün onlayn brifinqdə qeyd edib ki, o, İranın Trampın seçki qərargahına kiberhücum etməsi ilə bağlı iddiaların “doğruluğunu təsdiqləməyə hazır deyil”. Eyni zamanda o xatırladıb ki, iyulun sonunda ABŞ kəşfiyyatı İranın ABŞ prezident seçkilərinə təsir etmək cəhdlərini elan edib. “Beləliklə, biz onların niyyətlərindən mütləq xəbərdarıq” dedi Kirbi.
Politico daha əvvəl Trampın kampaniyasının xarici hakerlərin kiberhücumuna məruz qaldığını bildirmişdi. Respublikaçı qərargahın nümayəndəsinin sözlərinə görə, “ABŞ-a düşmən olan” xarici hakerlər qərargahın daxili yazışmalarına icazəsiz giriş əldə ediblər. Nəşr hücumda İranın şübhəli olduğunu iddia edir.