İsrail Hərbi Hava Qüvvələrinə məxsus qırıcı təyyarələr Livan paytaxtının cənubunda şiə təşkilatı Hizbullahın obyektlərinin olduğu bir neçə binaya raket zərbələri endirib.
TASS müxbirinin verdiyi məlumata görə, qalın tüstü buludlarının səmaya qalxdığı Qobeyri, Meşrəfiyə, Tayuni, Haret Horeik, Şiyə və El-Leylaki məhəllələrində güclü partlayış səsləri eşidilib.
İsrail təyyarələri artıq ikinci gündür ki, Beyruta hava hücumları həyata keçirib. Mülki müdafiə mənbəsi çərşənbə günü hava hücumu nəticəsində iki vətəndaşın yaralandığını bildirib.
Onun sözlərinə görə, İsrail komandanlığının cənub məhəllələrinin sakinlərinə göndərdiyi xəbərdarlıqdan sonra İsrail Hərbi Hava Qüvvələri zərbələr endirməyə başlayıb. Bombalanmış altı ərazidə qalan ailələr sürətlə təxliyə edilib.
Noyabrın 13-də İsrail təyyarələri Livanın paytaxtına 14 reyd keçirib. Hakimiyyət orqanları bir sıra küçələrdə yaşayış binalarına xeyli maddi ziyan dəydiyini qeyd etsə də, tələfat barədə məlumat yoxdur. (Tass)