Şifrələnmiş mesajlaşma xidməti Matrix Avropanın bir sıra ölkələrində hüquq-mühafizə qüvvələrinin keçirdiyi xüsusi əməliyyat çərçivəsində bloklanıb. Bu barədə Avropa Polis Agentliyi (Avropol) məlumat yayıb.
“Avropa Ədliyyə Əməkdaşlığı Agentliyi və Europol tərəfindən dəstəklənən əlaqələndirilmiş əməliyyatda mesajlaşma xidməti Hollandiya və Fransa hakimiyyət orqanları tərəfindən bloklanıb, daha sonra onların italyan, litva və ispan həmkarları tərəfindən tədbirlər görülüb”, – təşkilatın bəyanatında deyilir.
Hüquq-mühafizə orqanları üç ay ərzində mümkün cinayətkarların mesajlarını izləyə biliblər, bundan sonra yeni araşdırmaların aparılması və davam edən istintaqlarda sübut kimi istifadə olunacaq. Ümumilikdə, beynəlxalq narkotik ticarəti, silah ticarəti və çirkli pulların yuyulması kimi ağır cinayətlərlə bağlı olanlar da daxil olmaqla, 33 dildə 2,3 milyondan çox mesaj ələ keçirilib və şifrəsi açılıb.
Matrix mesajlaşma xidməti SkyECC və EncroChat kimi əvvəllər bloklanmış platformalardan texniki cəhətdən daha təkmil hesab olunur. O, ilk dəfə Hollandiya səlahiyyətliləri tərəfindən 2021-ci ildə holland jurnalisti öldürməkdə təqsirli bilinən cinayətkarın telefonunda aşkar edilib. Bundan sonra digər ölkələrin də qoşulduğu genişmiqyaslı araşdırmaya başlanılıb. (Tass)