İqlim dəyişikliyinə qarşı mübarizə və onun təsirlərinin azaldılması bərabərsizliklərin azaldılmasına yönəlməlidir.“Report”un məlumatına görə, bu fikirləri Azərbaycan Respublikasının İnsan hüquqları üzrə müvəkkili (Ombudsman) Səbinə Əliyeva “Respublika” qəzetində yayımlanan məqaləsində bildirib.Onun sözlərinə görə, iqlim dəyişikliyinə qarşı mübarizə məqsədilə insan hüquqlarının qorunmasına dair müxtəlif yanaşmalar irəli sürülə bilər.Ombudsman qeyd edib ki, xüsusilə inkişaf etməkdə olan ölkələrə və həssas icmalara dəstək verilməli, zəngin ölkələr öz karbon izlərini azaldaraq bu icmalara yardım etməlidir.İnsan hüquqları üzrə müvəkkil bu hüquqların qorunması üçün icmaların iqlim fəlakətlərinə qarşı dayanıqlılığını artırmağın vacibliyini vurğulayıb:“Bu, su ehtiyatlarının idarə edilməsi, kənd təsərrüfatı və yaşayış yerlərinin mühafizəsi kimi sahələrdə innovativ yanaşmaların tətbiqini tələb edir”.İqlim dəyişiklikləri ilə bağlı hüquqi və institusional qurumlar arasında daha sıx əməkdaşlıq yaradılmalı olduğunu bildirən S.Əliyeva bunun hüquq sistemlərinin, beynəlxalq təşkilatların və vətəndaş cəmiyyəti institutlarının birgə fəaliyyətinə əsaslanmalı olduğunu əlavə edib:“İqlim dəyişikliyi ilə bağlı hüquqi öhdəliklər insan hüquqlarını qorumağa yönələn tədbirlər olmalıdır.İnsan hüquqlarının iqlim dəyişikliyi ilə əlaqəli aspektləri barədə beynəlxalq və yerli ictimaiyyəti maarifləndirmək, qlobal təsirlərin azaldılması məqsədilə hüquq və ədalət prinsiplərinə əsaslanan hüquqi mexanizmlərin daha səmərəli şəkildə tətbiqinə xüsusi diqqət yetirmək lazımdır”.