Gəncə Dövlət Universitetinin (GDU) rektoru Yusif Yusibovun rəhbərlik etdiyi nümayəndə heyəti Türkiyənin Dokuz Eylül Universiteti ilə akademik əməkdaşlığı genişləndirmək məqsədilə bu ölkədə işgüzar səfərdədir.
GDU-dan AZƏRTAC-ın bölgə müxbirinə bildirilib ki, nümayəndə heyəti Dokuz Eylül Universitetində “Biologiya” ixtisası üzrə ikili diplom proqramında təhsil alan I və II kurs tələbələri ilə görüş keçirib. Görüş zamanı ikili diplom proqramının üstünlüklərindən danışan Yusif Yusibov Türkiyədə təhsil almaq imkanının gənclər üçün böyük şans olduğunu qeyd edib və bu proqram üzrə təhsil alan tələbələrin gələcəkdə peşəkar kadr kimi yetişəcəklərindən əmin olduğunu deyib.
Nümayəndə heyəti tələbələr üçün yaradılmış şəraitə, o cümlədən tədris otaqları, Biologiya, Mikrobiologiya, Zoologiya və Biologiya Elmi-Tədqiqat laboratoriyalarına baxış keçiriblər.
Daha sonra rektor Yusif Yusibov, Ümumi işlər üzrə prorektor Samir Məmmədov, İnnovasiyalar departamentinin direktoru Vasif Həsənov və Kimya-biologiya fakültəsinin dekanı İsfəndiyar Alverdiyev Dokuz Eylül Universitetinin maddi-texniki bazası ilə yaxından tanış olublar.