Belarusun Mərkəzi Seçki Komissiyası (MSK) indiyədək ölkədə prezident seçkiləri üçün 251 beynəlxalq müşahidəçini akkreditasiya edib. Bu barədə Respublika Mərkəzi Seçki Komissiyası öz saytında məlumat yayıb.
Onun sözlərinə görə, akkreditə olunmuş müşahidəçilərin əksəriyyəti (159) MDB-dən olan missiyanı təmsil edir. Xarici dövlətlərin seçki orqanları 20, Kollektiv Təhlükəsizlik Müqaviləsi Təşkilatının Parlament Assambleyası (KTMT PA) 14, Şanxay Əməkdaşlıq Təşkilatı 8, Birlik ölkələrinin parlamentləri 3 müşahidəçi ilə təmsil olunur. Həmçinin “44 müstəqil müşahidəçi, Qoşulmama Hərəkatının gənclər təşkilatından 2 müşahidəçi və Asiyada Qarşılıqlı Fəaliyyət və Etimad Tədbirləri üzrə Müşavirənin katibliyini təmsil edən 1 müşahidəçi akkreditə olunub”, – Belarus Mərkəzi Seçki Komissiyası qeyd edib.
Bundan əvvəl Belarusun Mərkəzi Seçki Komissiyası prezidentliyə beş namizədi qeydə alıb. Liberal Demokrat Partiyasının sədri Oleq Qaydukeviç, fərdi sahibkar Anna Kanopatskaya, hazırkı prezident Aleksandr Lukaşenko, Kommunist Partiyası Mərkəzi Komitəsinin birinci katibi Sergey Syrankov və Respublika Əmək və Ədalət Partiyasının sədri Aleksandr Xijnyak dövlət başçısı postu uğrunda mübarizə aparacaqlar. Seçkiqabağı təşviqat yanvarın 1-dən başlayacaq, seçkilər isə 2025-ci il yanvarın 26-da keçiriləcək. (Tass