ABŞ prezidenti Co Baydenin hakimiyyətdən gedən administrasiyası İsrailə 8 milyard dollar dəyərində silah paketi satmaq niyyətindədir, bu barədə Axios portalı mənbələrə istinadən məlumat yayıb.
Onların sözlərinə görə, ABŞ Dövlət Departamenti yəhudi dövləti ilə İsrailin ABŞ-dan silah və sursat alacağı müqavilə bağlamaq niyyəti barədə Konqresə qeyri-rəsmi məlumat verib. Konkret olaraq, ABŞ İsrailə qırıcılar və hücum helikopterləri üçün hava-hava raketləri, artilleriya mərmiləri, kiçik diametrli bombalar, əlavə JDAM sursat dəstləri, 500 funtluq bombalar (təxminən 227 kq) və digər döyüş sursatları verəcək.
Nəşrin mənbələri sövdələşmənin “İsrailin təhlükəsizliyinə uzunmüddətli dəstək” üçün nəzərdə tutulduğunu vurğulayır. Bəzi silahların birbaşa Pentaqonun anbarlarından İsrailə ötürüləcəyi gözlənilir, lakin əksər silahların çatdırılması “bir il və ya daha çox” vaxt aparacaq.
Axios vurğulayır ki, İsrailə mümkün silah satışı ABŞ Nümayəndələr Palatasının və Senatın Xarici Əlaqələr Komitələri tərəfindən təsdiqlənməlidir. (Tass)