ABŞ-ın yeni seçilmiş prezidenti Donald Tramp Rusiya lideri Vladimir Putinlə mümkün qədər tez görüşmək istəyir. Bu barədə o, Newsmax telekanalına müsahibəsində bildirib.
“Və bilirəm ki, o, görüşmək istəyir və mən çox tez görüşəcəyəm. Kaş ki, bu, daha tez baş versin. Amma bilirsən ki, ilk növbədə sən vəzifəyə başlamalısan”, – Tramp deyib.
Trampın gələcək milli təhlükəsizlik müşaviri Mayk Vals ABC News telekanalına müsahibəsində bildirib ki, Rusiya lideri ilə ABŞ-ın yeni seçilmiş prezidenti arasında telefon danışıqları yaxın gələcəkdə baş tuta bilər. Tramp bundan əvvəl prezidentliyinin ilk altı ayında Putinlə görüşmək istədiyini və bu cür təmaslara hazır olduğunu bildirmişdi. Rusiya dövlət başçısının mətbuat katibi Dmitri Peskov qeyd edib ki, Putin heç bir şərt olmadan yeni amerikalı həmkarı ilə görüşməyə hazırdır, lakin onun sözlərinə görə, hələlik “konkretlik yoxdur”. (Tass)