Ukrayna və Böyük Britaniya xüsusi birgə donanma yaradacaq və təlim missiyalarını genişləndirəcək. Bu sözləri Vladimir Zelenski Böyük Britaniyanın baş naziri Key Starmerlə birgə mətbuat konfransında deyib.
Bundan əvvəl Kiyevdə səfərdə olan Zelenski ilə Starmer yüz illik ortaqlıq müqaviləsi imzalayıblar. “Ukrinform” agentliyi qeyd edib ki, bu sənəd müdafiə sektorunda ikitərəfli münasibətləri dərinləşdirəcək, bundan əlavə, Kiyevə gələcək hərbi yardımı nəzərdə tutur. “Müqavilə xüsusi birgə donanmaların yaradılmasını nəzərdə tutur, biz təlim missiyalarımızı genişləndiririk, onların sayını artırırıq”, – deyə Zelenski bildirib.
Zelenskinin rəsmi saytında dərc edilən razılaşmanın mətnindən belə çıxır ki, donanma NATO müttəfiqləri ilə birlikdə hər iki ölkə üçün strateji əhəmiyyət kəsb edən sularda, xüsusən də Qara dənizdə fəaliyyət göstərəcək. Müqaviləyə əsasən, Böyük Britaniya Ukraynaya mühüm dəniz infrastrukturunun mühafizəsini gücləndirmək üçün dəstək verəcək.
Bundan əlavə, Zelenskinin ofisinin rəhbəri Andriy Ermak Ukrayna televiziyasında çıxış edərək bildirib ki, Kiyev Ukraynaya xarici qoşunların yerləşdirilməsi ilə bağlı Böyük Britaniya və Fransa ilə məsləhətləşmələri davam etdirir. (Tass)