Misir, İsrail, Qətər, Fələstin Milli Administrasiyası (PNA) və ABŞ-ın nümayəndələri Qəzza zolağında atəşkəs razılaşmasının icrasına nəzarət edəcəklər. Bu barədə “Əl-Qahirə əl-İxbariyyə” telekanalı məlumat yayıb.
Onun mənbələrinə görə, adıçəkilən dövlətlərin nümayəndələri Qəzza ilə bağlı “iştirakçılar arasında effektiv koordinasiyanı təmin etmək və sazişin şərtlərinin yerinə yetirilməsinə nəzarət etmək” üçün yaradılmış Sazişin İcrasına Nəzarət Mərkəzinə daxil ediləcəklər. Telekanalın məlumatına görə, mərkəzin yaradılması barədə qərar Misir, İsrail, Qətər, Fələstin və Amerika nümayəndə heyətlərinin Qahirədə keçirilən görüşündən sonra qəbul edilib. Əl-Qahirə əl-İxbariyyənin mənbəyi vurğulayır ki, danışıqlar “müsbət atmosferdə keçdi” və “bütün iştirakçılar arasında konsensusun mövcudluğunu nümayiş etdirdi”.
Cümə günü səhər saatlarında Misir Xarici İşlər Nazirliyi vasitəçilərin Qahirədə Qəzza Sazişinin İcrasına Nəzarət Mərkəzi yaratmaq planlarını açıqlayıb. (Tass)