Azərbaycanın müasir tarixinə ən faciəli günlərdən biri, eyni zamanda, xalqımızın qəhrəmanlıq səhifəsi kimi daxil olan 20 Yanvar faciəsinin 35-ci ildönümü ilə bağlı Daşkəsən rayonunda anım tədbiri keçirilib.
AZƏRTAC-ın bölgə müxbirinin verdiyi məlumata görə, Daşkəsən Şəhidlər xiyabanında təşkil olunan anım mərasimində rayon icra hakimiyyətinin, hüquq-mühafizə orqanlarının rəhbərləri, idarə, müəssisə və təşkilatların kollektivləri, hərbçilər, şəhid valideynləri, müharibə iştirakçıları və ictimaiyyət nümayəndələri iştirak ediblər. Şəhidlər xiyabanındakı “Əbədi məşəl” abidəsinin önünə əklil qoyulub, 20 Yanvar faciəsi qurbanlarının və bütün şəhidlərimizin xatirəsi anılıb. Birinci və İkinci Qarabağ müharibələri zamanı torpaqlarımızın azadlığı uğrunda şəhid olmuş igid daşkəsənlilərin məzarları üzərinə tər qərənfillər düzülüb.
Saat 12:00-da 20 Yanvar şəhidlərinin əziz xatirəsi bir dəqiqəlik sükutla yad olunaraq, rayon ərazisində nəqliyyatın hərəkəti dayandırılıb, avtomobillər vasitəsilə səs siqnalları verilib.
20 Yanvar faciəsi şəhidlərinin xatirəsi Gədəbəy, Tovuz, Ağstafa və Qazax rayonlarında da böyük ehtiramla anılıb.