Ermənistan hakimiyyəti rus və iranlı həmkarları ilə gündəlik təmasdadır, məsələlər qarşılıqlı anlaşma şəraitində həll olunur. Bu barədə respublikanın xarici işlər naziri Ararat Mirzoyan parlamentdə hökumət saatında bildirib.
“Mən Moskvadan səhər tezdən qayıtdım, müavinim bir gün əvvəl Tehrandan qayıtdı. Biz Moskva və Tehran tərəfdaşlarımızla demək olar ki, hər gün əlaqə saxlayırıq, bir çox məsələləri koordinasiya edirik, qarşılıqlı anlaşma və tərəfdaşlıq şəraitində işləyirik”.
Bundan əvvəl Ermənistanın baş naziri Nikol Paşinyan bildirib ki, İrəvan balanslaşdırılmış xarici siyasət aparır, bunu XİN rəhbərinin Rusiyaya son səfəri, həmçinin ABŞ-la imzalanmış strateji tərəfdaşlıq xartiyası sübut edir.
Yanvarın 21-də Ermənistanın xarici işlər naziri Ararat Mirzoyan Moskvaya səfər edib və rusiyalı həmkarı Sergey Lavrovla danışıqlar aparıb. Bundan əvvəl o, ABŞ-da olub və keçmiş dövlət katibi Entoni Blinkenlə strateji tərəfdaşlıq haqqında xartiya imzalayıb. Blinkenin özünün görüşün əvvəlində elan etdiyi kimi, ikitərəfli təhlükəsizlik əməkdaşlığını gücləndirmək üçün yaxın həftələrdə ABŞ Gömrük və Sərhəd Mühafizəsi rəsmilərindən ibarət bir qrup Ermənistana göndəriləcək.