SOCAR-ın yeni “yaşıl” təyinatlı istiqrazlarına abunə yazılışı davam edir.
Bu istiqrazlar 5 il dövriyyədə olacaq və sahiblərinə hər il sabit olaraq 6 faiz gəlir qazandıracaq. Kupon ödənişləri isə 3 aydan bir həyata keçiriləcək ki, bu da investorlar üçün müntəzəm gəlir axını təmin edir.
“Yaşıl” istiqrazları əldə etmək üçün son tarix fevralın 28-dir.
SOCAR “Yaşıl Gəlir, Yaşıl Gələcək” şüarı altında buraxdığı bu istiqrazlarla yalnız vətəndaşlara etibarlı və sabit gəlir qazandırmaqla kifayətlənmir, eyni zamanda, ekoloji cəhətdən təmiz enerji mənbələrinin inkişafını da dəstəkləmək niyyətindədir.
İstiqrazlardan əldə olunan vəsait, ölkəmizdə yaşıl enerji layihələrinə sərf ediləcək. Bu, Azərbaycanın yaşıl enerji sahəsindəki təşəbbüslərinə dəstək vermək məqsədini daşıyır.
“SOCAR Capital” şirkətindən bildirilib ki, bu istiqrazlar yalnız maliyyə baxımından deyil, eyni zamanda, ekoloji cəhətdən də müsbət təsir göstərəcək bir investisiya imkanıdır.
“Yaşıl” istiqrazları, 1 və 5 saylı “ASAN xidmət” mərkəzlərindəki SOCAR istiqrazları köşklərindən, eləcə də ölkəmizdə qeydiyyatdan keçmiş investisiya şirkətlərindən əldə etmək mümkündür.
Ətraflı məlumat üçün 1999 çağrı mərkəzi və socaristiqraz.az veb-saytına müraciət edə bilərsiniz.