Şimali Atlantika Alyansı hərbi təchizatı koordinasiya edən Visbadendəki komandanlığı, eləcə də Ukraynadakı nümayəndəliyi vasitəsilə Kiyevə hərbi dəstəyini davam etdirəcək. Bunu təşkilatın baş katibi Mark Rutte ABŞ dövlət katibi Marko Rubionun ilk dəfə iştirak etdiyi NATO xarici işlər nazirlərinin iclasının yekunlarına dair mətbuat konfransında deyib.
“NATO Visbadendəki komandanlıq və Ukraynadakı missiyamız vasitəsilə Ukraynaya dəstəyini davam etdirəcək”, o deyib. “NATO Ukraynaya dəstək verməyə hazırdır ki, o, döyüşü davam etdirə bilsin”.
Baş katib ABŞ-ın atəşkəslə bağlı danışıqlara dair səylərini dəstəkləyib, eyni zamanda Avropa NATO ölkələri arasında Ukraynaya qoşun yeritmək imkanları ilə bağlı müzakirələri alqışlayıb.
Rutte vurğulayıb ki, münaqişə bitdikdən sonra NATO Ukraynanı silahlandırmaq niyyətindədir ki, “Rusiya daha bir kvadrat kilometr ərazi də qazana bilməsin”. (Tass)