Çin ABŞ-ı qarşılıqlı maraqlara hörmət etməyə və ticarət və iqtisadi fikir ayrılıqlarını dialoq və məsləhətləşmələr yolu ilə həll etməyə çağırır. Bu barədə Çin Xalq Respublikası Dövlət Şurasının Mətbuat İdarəsinin Vaşinqtonla ikitərəfli ticarət-iqtisadi əlaqələrlə bağlı məsələlərə dair dərc etdiyi sənəddə (“Ağ Kitab”) deyilir.
Sənəddə deyilir: “Problemin həllinin açarı bir-birinin əsas maraqlarına və narahatlıqlarına hörmət etmək, dialoq və məsləhətləşmələr yolu ilə düzgün həll yolu tapmaqdır”.
Çin Dövlət Şurasının Mətbuat İdarəsi də “fərqli iqtisadi sistemlərə malik olan Çin və ABŞ-ın ticarət və iqtisadi əməkdaşlıqda fərqliliklər yaşamasının normal olduğunu” qeyd edib. Eyni zamanda, sənəddə ümid ifadə olunur ki, Pekin və Vaşinqton “bir-birinə doğru irəliləyəcək, qarşılıqlı hörmət, dinc yanaşı yaşama və qazan-qazan əməkdaşlıq prinsiplərinə əməl edəcək”.
Aprelin 2-də ABŞ prezidenti Donald Tramp 185 ölkə və ərazinin məhsullarına gömrük rüsumunun tətbiq ediləcəyini açıqlayıb. 10%-lik universal tariflər aprelin 5-dən qüvvəyə minib, fərdi tariflər isə aprelin 9-da fəaliyyətə başlayıb.Bundan başqa, ABŞ administrasiyası aprelin 3-dən bütün idxal olunan avtomobillərə 25%-lik gömrük rüsumları tətbiq edib. (Tass)