ABŞ prezidentinin Ukrayna və Rusiya üzrə xüsusi nümayəndəsi Keyt Kelloq hesab edir ki, Ukrayna münaqişəsinin həlli prosesi düzgün istiqamətdə gedir.
“Mən hərtərəfli atəşkəs haqqında danışarkən, dənizdə, havada, quruda, həmçinin sənaye [saytlarında] minimum 30 gün müddətinə [atəşkəsi] nəzərdə tuturam. Sonra bu, daha uzunmüddətli sülh sazişinə – daimi sülh sazişinə çevriləcək. Düşünürəm ki, biz düzgün yoldayıq”, – Kelloq Fox News-a deyib.
Xüsusi nümayəndə ABŞ dövlət katibi Marko Rubionun yaxın gələcəkdə irəliləyiş əldə olunmasa, Vaşinqtonun Ukrayna böhranının həlli cəhdlərini məhdudlaşdıra biləcəyi barədə bəyanatını da şərh edib. “Onun sözləri sərt idi, lakin sərt olmalı idi. Çünki baş verənlərdən bezmişik. Dünyada ABŞ-ın iştirak etməli olduğu çox şey var və bu müharibə çox uzun müddətdir davam edir. Amma mən hesab edirəm ki, münaqişəni bitirmək üçün fürsət var”, – Kelloq deyib. (Tass )