Ukrayna, Böyük Britaniya, Fransa və Almaniya nümayəndələrinin Londonda keçirilən görüşü bəyannamələrin qəbulu və gələcək məsləhətləşmələr haqqında razılaşma ilə başa çatıb. Bu barədə Vladimir Zelenskinin ofisinin rəhbəri Andrey Yermak məlumat verib.
Onun sözlərinə görə, görüşdə Ukrayna tərəfdən o, xarici işlər naziri Andriy Sibiha və müdafiə naziri Rustem Umerov iştirak edib. “Böyük Britaniya tərəfdən – Baş nazirin milli təhlükəsizlik üzrə müşaviri Conatan Pauell, Fransa tərəfdən – Prezidentin diplomatik müşaviri Emmanuel Bonn, Almaniya tərəfdən – kanslerin xarici siyasət və təhlükəsizlik üzrə müşaviri Yens Plötner iştirak edib”, – Yermak öz Telegram kanalında yazıb.
“Biz sülhə nail olmaq üçün növbəti müntəzəm məsləhətləşmələr barədə razılığa gəldik”, – deyən Yermak, məsləhətləşmələrin iştirakçılarının ABŞ prezidenti Donald Trampın Ukraynadakı münaqişənin sülh yolu ilə həlli istiqamətində göstərdiyi səylərə sadiqliklərini vurğuladıqlarını bildirib. (Tass)