Azərbaycan xalq ədəbiyyatının parlaq simalarından biri olan Aşıq Ələsgərin yaradıcılığına həsr olunmuş “Qədim yurd yerlərimiz, soykökümüz Aşıq Ələsgər” adlı tədbir 2025-ci ilin “Konstitusiya və Suverenlik İli” çərçivəsində baş tutur. XIX əsr Azərbaycan aşıq sənətinin ən görkəmli nümayəndələrindən olan Aşıq Ələsgər yalnız bölgənin deyil, ümumxalq ədəbiyyatının da yaddaqalan söz ustadlarındandır. Onun qoşmaları, gəraylıları və təcnisləri Azərbaycan türklərinin fəlsəfi dünyagörüşünü, ictimai-sosial düşüncəsini və həyat tərzini bədii dillə ifadə edib.
AZƏRTAC xəbər verir ki, bu sözləri Azərbaycan Dövlət Pedaqoji Universitetinin prorektoru professor Mahirə Hüseynova bu gün keçirilən “Qədim yurd yerlərimiz, soykökümüz Aşıq Ələsgər” adlı tədbirdə çıxışı zamanı söyləyib.
O, Aşıq Ələsgərin zəngin poetik irsi, milli-mənəvi dəyərlərimizin daşıyıcısı kimi rolu və aşıq sənətindəki mövqeyi barədə danışıb: “Aşıq Ələsgər yaradıcılığı yalnız bir folklor nümunəsi deyil, milli mənlik şüurumuzun güclənməsində mühüm faktordur. Onun obrazı dədə-baba torpaqlarımızın ruhunu yaşadan bir simvoldur”.