Prezident yanında Antiinhisar və İstehlak Bazarına Nəzarət Dövlət Agentliyinin məqsədi sahibkarları cərimələmək deyil.
“Report” xəbər verir ki, bunu qurumun sədri Elnur Bağırov Bakıda “Ticarət şəbəkələrinin bazar iqtisadiyyatında rolu: imkanlar və perspektivlər” mövzusunda keçirilən ictimai müzakirələrdə bildirib.
“Məqsədimiz sahibkarların maarifləndirilməsi, onların hüquq və vəzifələri barədə məlumatlı olmasıdır. Bu da nəticə etibarilə, istehlakçıların, yəni ölkə vətəndaşlarının hüquqlarının qorunmasına xidmət edir. Agentlik sahibkarları qarşılıqlı əməkdaşlığa dəvət edir, hər zaman açıq dialoqa hazırdır”, – deyə o qeyd edib.
Sədrin sözlərinə görə, bugünkü tədbir olduqca əhəmiyyətlidir :”Çünki ticarət şəbəkələrinin inkişafı yalnız pərakəndə sektorun çərçivəsi ilə məhdudlaşmır. Bu proses iqtisadiyyatın ümumi dinamikasına, istehsal sektorunun genişlənməsinə və sosial rifahın yüksəlməsinə təsir göstərir. Bazar iqtisadiyyatının əsas meyarlarından biri sağlam və ədalətli rəqabətin təmin edilməsidir. Ticarət şəbəkələri rəqabətə əsaslanan mühitin formalaşmasında, inkişaf və davamlılığında mühüm rol oynayır. Bununla yanaşı, ticarət şəbəkələri istehsalçı və istehlakçı arasında etibarlı və davamlı əlaqə yaradan mühüm platforma kimi çıxış edir”.