Bakı Beynəlxalq Multikulturalizm Mərkəzində “Samur” Ləzgi Mədəniyyət Mərkəzi İctimai Birliyinin hesabat-seçki yığıncağı keçirilib.
Mərkəzdən AZƏRTAC-a bildirilib ki, tədbirdə əvvəlcə Dövlət Himni səsləndirilib, Azərbaycanın suverenliyi uğrunda canından keçən şəhidlərimizin xatirəsi bir dəqiqəlik sükutla yad olunub.
Tədbiri giriş sözü ilə açan Bakı Beynəlxalq Multikulturalizm Mərkəzinin icraçı direktorunun müavini Ramin Qəmbərov Azərbaycanda etnik müxtəlifliyə əsaslanan tolerantlıq və multikulturalizmin dövlət siyasətinin tərkib hissəsi olduğunu vurğulayaraq, ölkədə müxtəlif etnik və dini icmaların sülh, həmrəylik şəraitində yaşamasına mühüm əhəmiyyət verildiyini bildirib.
“Samur” Ləzgi Mədəniyyət Mərkəzi İctimai Birliyinin sədri İmran Rzayev bildirib ki, Azərbaycanda hər zaman azsaylı xalqlara qayğı ilə yanaşılır, onların mədəniyyətinin, adət-ənənələrinin qorunub saxlanılmasına önəm verilir, etnik icmaların mədəniyyət mərkəzlərinin fəaliyyətinə dəstək göstərilir, onların dillərində dərsliklər, kitablar çap olunur. O vurğulayıb ki, Prezident İlham Əliyevin rəhbərliyi ilə ölkədə uğurlu multikulturalizmin siyasəti aparılır, bütün xalqların hüquq və azadlıqlarına bərabər yanaşılır, etnik azlıqlara xüsusi diqqət və qayğı göstərilir.
Sonra “Samur” Ləzgi Mədəniyyət Mərkəzi İctimai Birliyinin İdarə Heyətinin sədrinin seçkisi keçirilib, idarə heyətinin üzvlərinin hesabatı dinlənilib.