Lənkəran şəhərində Lənkəran, Astara, Masallı, Lerik və Cəlilabad rayonlarının təhsil müəssisələrinin peşə təmayüllü siniflərində təhsil alan şagirdlərin əl işlərindən ibarət “Peşə sərgisi” keçirilib.
AZƏRTAC-ın bölgə müxbiri xəbər verir ki, tədbir Lənkəran-Astara Regional Gənclər və İdman İdarəsi, Lənkəran-Astara Regional Təhsil İdarəsi və Lənkəran-Astara Regional Mədəniyyət İdarəsinin birgə təşkilatçılığı ilə ərsəyə gəlib.
Tədbirin əsas məqsədi yeniyetmə və gənclərin peşə təhsilinə hazırlanması, onların peşə ixtisaslarına aid səriştələrinin inkişaf etdirilməsi, peşələr üzrə yiyələndikləri ilkin bilik və bacarıqları nümayiş etdirmək və onlarda xüsusi stimul yaratmaq olub.
Sərgidə dülgərlik, dərzilik, mebel ustası, aşpaz, kompüter operatoru, qənnadçı və digər peşələr üzrə ixtisas siniflərində təhsil alan şagirdlər əl işlərini nümayiş etdiriblər.
Tədbirin sonunda peşə təmayüllü siniflərin təşkilində, həmçinin sərginin nümayişində fəallığı ilə fərqlənən qrup rəhbərləri, müəllim və şagirdlər təşəkkürnamələrlə təltif olunublar.