AZƏRTAC xəbər verir ki, T.Manafzadənin iştirakı ilə konsert proqramı Antakya rayonundakı “EXPO Kesicik” qədim amfiteatrının ərazisində olub.
Azərbaycanın Əməkdar artisti konsertdən əvvəl Türkiyədə baş verən zəlzələdə həlak olanların ailələrinə və yaxınlarına başsağlığı verib.
Genişmiqyaslı təbii fəlakətin nəticələrinin aradan qaldırılması istiqamətində tədbirlərin davam etdirildiyi vilayətin sakinləri T.Manafzadəyə mənəvi dəstəyə görə təşəkkür edib, onun çıxışını sürəkli alqışlarla qarşılayıblar.
Turan Manafzadə təbii fəlakət bölgəsinə səfəri çərçivəsində Hatayın Payas rayon Təbiət Elmləri Liseyində də olub. Azərbaycanın Əməkdar artisti bu liseyin musiqi sinfini lazım olan ləvazimatla, o cümlədən musiqi alətləri ilə təmin edib.
Əməkdar artist “Yeddi gözəl” musiqi qrupunun üzvləri ilə birlikdə onun adını daşıyan sinif otağının açılışında da iştirak edib.
Liseyin şagird və müəllim kollektivi qarşısında çıxış edən Əməkdar artist musiqi sinfinin açılması ilə təbii fəlakət zonasının sakinlərinin gənc nəslinin arzularının gerçəkləşəcəyinə ümidvar olduğunu bildirib.
Sinif otağının açılışında Payas rayon icra hakimiyyətinin başçısı Kürşat Karaca və Hatay şəhər bələdiyyəsi baş katibinin müavini Ahmet Keskin iştirak ediblər.