Almaniya kansleri Fridrix Merz bildirib ki, Avropa İttifaqı (Aİ) artıq Rusiyaya qarşı növbəti sanksiyalar paketini hazırlayır və bununla bağlı iyunun sonuna qədər qərar qəbul edilməlidir.
Merz Yunanıstanın baş naziri Kiriakos Mitsotakislə Berlində keçirdiyi birgə mətbuat konfransında deyib: “Sanksiyalara gəlincə, Avropa İttifaqı artıq növbəti paketi hazırlayır. Bu məsələ ilə bağlı qərar iyunun sonuna qədər verilməlidir”. Almaniya kansleri sanksiyaların enerji sektoruna, eləcə də sözdə kölgə donanmasına təsir edəcəyini iddia edib.
“Şəxsən özüm də daxil olmaqla, bunu ardıcıl surətdə və Avropa İttifaqı çərçivəsində mümkün olan ən böyük əməkdaşlıqla həyata keçirmək əzmindəyik. Biz bunu təkbaşına edə bilmərik. Amma biz, əlbəttə ki, hələ də tərəddüd edən ölkələri bunun düzgün yol olduğuna inandırmağa çalışacağıq”, – deyə Almaniya hökumətinin başçısı yekunlaşdırıb.
Aİ-nin Daimi Nümayəndələr Komitəsi bazar ertəsi Brüsseldə toplaşıb. İclasın gündəliyinə “Ukraynanın ərazi bütövlüyü və suverenliyinə xələl gətirdiyinə görə Rusiyaya qarşı məhdudlaşdırıcı tədbirlər”in təsdiqi daxildir. Keçən həftə Avropa Komissiyası Aİ ölkələrinə 17-ci sanksiya paketini təqdim etdi və o, Aİ xarici işlər nazirlərinin mayın 20-də keçiriləcək iclasında bu paketin təsdiqini istəyir. Bloomberg-in daha əvvəl xəbər verdiyi kimi, AK Qərbin qiymət tavanlarını təyin etmək cəhdlərinə məhəl qoymayaraq, Rusiya neftini daşıyan 60 şəxs və təşkilatı və 150 tankeri qara siyahıya salmağı təklif edir. (Tass)