Azərbaycanda kənd təsərrüfatı sahəsində yerli istehsal olan süni intellekt əsaslı texnologiya istifadə olunur.
AZƏRTAC xəbər verir ki, bu barədə Azərbaycan Robototexnika və Mühəndislik Akademiyasının Əməliyyatlar üzrə baş meneceri Ziya İsmayılov 2-ci Beynəlxalq Aqrar İnnovasiya Forumu çərçivəsində “Süni intellektin aqrar sahədə tətbiqi” mövzusunda konfransda bildirib.
“Hazırda dövlət subsidiya layihəsi çərçivəsində fəaliyyət göstərən startap layihə – “Nutlab” startapımız var. Azərbaycan istehsalı olan bu layihə – fındıqyığan aqreqatdır. “Nutlab” startapı 50 işçinin bir gündə görə biləcəyi işi bir neçə saatda görür və funksionallıq olaraq bir gündə 2 hektarlıq bir ərazidə fındıq yığımını həyata keçirə bilir. Hal-hazırda fındıq üzrə ixtisaslaşmış Zaqatala və Balakən rayonlarında bu aqreqatın istifadəsi həyata keçirilir. Bununla bərabər, sadəcə, fındıq yığımı deyil, həm də yer belləmə, əkin, sulama və kartof yığımı ilə bağlı fəaliyyət göstərə bilir”, – deyə Z.İsmayılov əlavə edib.
O bildirib ki, yeni startap layihəsi “Ağıllı tasma” artıq hazırdır: ““Ağıllı tasma” heyvandarlıqla məşğul olan fermerlər üçün düşünülən bir layihə olacaq. Bu layihələr “Made in Azerbaycan” brendi altında fəaliyyət göstərir”.