ABŞ yaxın iki ayda xarici ölkələrdən 10 trilyon dollar investisiya almaq niyyətindədir. Bu barədə Amerika prezidenti Donald Tramp bəyan edib.
“İki ay ərzində 10 trilyon dollar sərmayə cəlb edəcəyik. Dünyanın heç bir ölkəsi bu səviyyəyə yaxınlaşmayıb. Mən böyük sərmayə qoyan Qətər əmiri Şeyx Təmim bin Həməd Al Taniyə təşəkkür etmək istəyirəm. Bütün bunların nəticəsi ABŞ-da iki, üç, bəlkə də dörd milyon iş yerinin yaradılması olacaq”, – Tramp Qətər biznesi və Doha-nın rəhbəri ilə görüşündə deyib. O, investisiyaların ABŞ-ın dövlət borcunu ödəməyə kömək edəcəyinə ümid etdiyini bildirib.
ABŞ-ın dövlət borcu hazırda 36,2 trilyon dolları ötür. Konqresin Büdcə Ofisi onun 2034-cü ildə 50 trilyon dolları keçə biləcəyini təxmin edir. Martın sonunda agentlik borc tavanı qaldırılmadığı təqdirdə ABŞ hökumətinin avqust və ya sentyabr ayına qədər defoltla üzləşəcəyini proqnozlaşdırmışdı. Borc tavanı ABŞ federal hökumətinin fəaliyyətini maliyyələşdirmək üçün Xəzinədarlıq Departamentinin nə qədər borc ala biləcəyinin ölçüsüdür.