Polşa Silahlı Qüvvələri bir sıra NATO ölkələrinin hərbçiləri ilə birlikdə Rusiya Federasiyasının Kalininqrad vilayəti ilə sərhəddən 70 km aralıda yerləşən Orşiş poliqonunda “Dzielny Dzik 25” (“Cəsur qaban – 25”) taktiki təlimləri keçirir. Bu barədə Polşa Ordusunun Baş Qərargahı məlumat yayıb.
“Hava və relyefdən asılı olmayaraq, həm gündüz, həm də gecə döyüş şəraitində NATO bölmələrinin operativ qarşılıqlı fəaliyyətinin artırılması “Cəsur qaban” təliminin əsas məqsədidir. Bu, Litva, ABŞ, Çexiya, Rumıniya və İsveçdən olan əsgərlərin iştirak etdiyi 16-cı Mexanikləşdirilmiş Diviziya tərəfindən bu il keçirilən ən böyük tədbirdir. Polska Zbrojna onlayn portalı yazır ki, manevrlərə 3000 əsgər və 600 texnika, o cümlədən K2 tankları və K9 haubitsaları, F-16, Gripen və Eurofighter qırıcıları, həmçinin FlyEye pilotsuz təyyarələri cəlb olunub. (Tass)
Qeyd olunur ki, may ayının sonunadək davam edəcək təlimlər təkcə Orşiş poliqonunda deyil, Varmian-Masuriya Voyevodalığının digər yerlərində də keçiriləcək.