AMEA-nın Nəsimi adına Dilçilik İnstitutunun əməkdaşları Türkiyənin Bolu şəhərinin Abant İzzət Baysal Universitetində keçirilən “Süni intellekt və hibermedia” adlı 2-ci beynəlxalq simpoziumda iştirak ediblər.
İnstitutdan AZƏRTAC-a bildirilib ki, simpoziumda Türk dilləri şöbəsinin müdiri professor İsmayıl Kazımov “Süni intellektin orta məktəblərdə mətnlərlə öyrədilməsi” və Azərbaycan dialektologiyası şöbəsinin aparıcı elmi işçisi dosent Kubra Quliyeva “Süni intellekt və müasir dialektologiya” mövzularında məruzə ediblər.
Texnoloji tərəqqi, rəqəmsal transformasiya, xüsusi olaraq süni intellekt alətlərindən istifadə amilləri bu gün dilçiliyin müxtəlif sahələrinin öyrənilməsində əhəmiyyətli rol oynayır. Alimlər süni intellektin mətn təməli üzərində linqvistik əlamətlərinin orta məktəb şagirdlərinə öyrədilməsinin problemlərindən danışıb. Vurğulanıb ki, texnologiyanın inkişafı nəticəsində idrak və dilin əlaqəsi süni intellekt problemi ilə sıx bağlıdır.
Sonra İsmayıl Kazımov Abant İzzət Baysal Universitetinin Jurnalistika fakültəsinin tələbələri ilə görüşüb. Alim sosial mediada dilin inkişafı, dil normalarının qorunması, elektron media mətnlərində süni intellektin təsiri məsələlərini diqqətə çatdırıb.
Qeyd edək ki, simpoziumda Qazaxıstan, Özbəkistan, Türkmənistan və Qırğızıstandan alimlər qatılıb.