Türkiyə Xarici İşlər Nazirliyi Cenin şəhərində Türkiyənin Qüdsdəki Baş Konsulluğunun əməkdaşı da daxil olmaqla bir qrup diplomatın İsrail əsgəri tərəfindən atəşə tutulmasını qətiyyətlə pisləyib və hadisənin araşdırılmasına çağırıb.
“Biz Qüdsdəki Baş Konsulluğumuzun əməkdaşı da daxil olmaqla bir qrup diplomatın Cenin şəhərinə səfəri zamanı İsrail əsgərləri tərəfindən atəşə tutulmasını ən kəskin şəkildə pisləyirik. Diplomatların həyatını riskə atan bu hücum İsrailin beynəlxalq hüquqa və insan haqlarına sistematik etinasızlığının daha bir nümunəsidir”, – nazirliyin bəyanatında deyilir.
Orada bildirilir ki, “diplomatlara qarşı hücumlar təkcə şəxsi təhlükəsizliyə deyil, həm də dövlətlər arasında münasibətlərin əsasını təşkil edən hörmət və etimad mühitinə ciddi təhlükə yaradır”. “Hücum dərhal araşdırılmalı və günahkarlar məsuliyyətə cəlb edilməlidir. Biz beynəlxalq ictimaiyyəti bu təhlükəli hərəkəti ən sərt şəkildə pisləməyə və İsrailin cəzasızlığına son qoymaq üçün konkret addımlar atmağa çağırırıq”, – Türkiyə Xarici İşlər Nazirliyi bildirib. (Tass)