Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyində (SXA) nazirlik yanında İctimai şuranın üzvləri ilə görüş keçirilib.
Agentliyin İdarə Heyətinin sədri Vüqar Behbudov qurumun fəaliyyət istiqamətləri, həssas əhali qruplarından olan şəxslərlə aparılan sosial iş, onlara göstərilən sosial xidmətlər, eləcə də həyata keçirilən layihələr barədə məlumat verib.
Agentliyin İctimaiyyətlə əlaqələr və kommunikasiya şöbəsindən AZƏRTAC-a bildirilib ki, xüsusi qayğıya ehtiyacı olan şəxslər səyyar, stasionar və yarımstasionar xidmətlərlə təmin edilib. Qeyd edilib ki, xidmətlərə əlçatanlığın təmin edilməsi məqsədilə respublikanın bir sıra bölgələrində müxtəlif tədbirlər həyata keçirilir.
İmtiyazlı şəxslərin mənzil təminatı, sanatoriya-kurort yollayışları, eləcə də əlilliyi olan şəxslərin cəmiyyətə inteqrasiyası və digər mövzular barədə ətraflı məlumat verilib. Hədəflər, sosial xidmətlərin əhatə dairəsinin genişləndirilməsi istiqamətində aparılan işlərdən bəhs olunub. Agentliyin fəaliyyət istiqamətlərinə aid mövzularda qonaqları maraqlandıran suallar cavablandırılıb.
İctimai şuranın sədri Elşad Məmmədovun, şuranın digər üzvlərinin fikirləri və təklifləri dinlənilib, gələcək əməkdaşlıq məsələlərinə dair fikir mübadiləsi aparılıb.