İqtisadi İslahatların Təhlili və Kommunikasiya Mərkəzində (İİTKM) “Böyük Qayıdış: Ulu Öndər Heydər Əliyev strategiyasının nəticəsi kimi” mövzusunda dəyirmi masa keçirilib.
AZƏRTAC xəbər verir ki, tədbirdə, şəhidlərimizin müqəddəs ruhunun bir dəqiqəlik sükutla yad edilməsi ilə başlanan tədbirdə Ulu Öndərin həyat və fəaliyyəti, eləcə də Prezident İlham Əliyevin 20 illik fəaliyyətinə dair videoçarx nümayiş etdirilib.
Milli Məclisin deputatı Aqil Məmmədov Ümummilli Lider Heydər Əliyev strategiyasının nəticələri, 44 günlük Vətən müharibəsində əldə olunan tarixi Zəfər, işğaldan azad edilmiş ərazilərdə görülən işlər və perspektivlər barədə fikirlərini bölüşüb.
Daha sonra İİTKM-in Strateji planlaşdırma şöbəsinin müdiri Aqil Əsədov çıxış edib. O, İİTKM-in fəaliyyəti, o cümlədən qurumun monitorinq və qiymətləndirməsini həyata keçirdiyi “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” barədə məlumat verib, görülən işlərdən danışıb.
Tədbir çərçivəsində müxtəlif dövlət qurumlarında çalışan keçmiş məcburi köçkünlər işğaldan azad edilmiş ərazilərin perspektivləri barədə öz fikir və mülahizələrini bölüşüb, iştirakçıların suallarını cavablandırıblar.
Deputat Aqil Məmmədov, həmçinin kəlbəcərli gənclərin problemləri ilə maraqlanıb və öz tövsiyələrini verib.