Sabirabad rayonu üzrə 91 təsərrüfatda barama bəslənilib və hazırda məhsul tədarük davam edir.
AZƏRTAC-ın bölgə müxbiri xəbər verir ki, Sabirabaddan olan kümçülər 20 günə yaxındır bəslədikləri baramaları təhvil verirlər. Sabirabad Dövlət Aqrar İnkişaf Mərkəzindən verilən məlumata görə, bu il kümçülərə, ümumilikdə, 180 qutu olmaqla 3 kiloqram 420 qram ipəkqurdu toxumu paylanılıb. Həmçinin baramaçılığın inkişafı üçün rayon ərazisində tut bağlarının da sahəsi genişləndirilib. Rayon ərazisində Çin mənşəli və yerli çəkil ağacları olmaqla, 292 min ədəddən artıq tut ağacı var ki, bu da istehsalın artırılmasına böyük imkanlar yaradıb.
Bu günə kimi rayon kümçüləri tərəfindən 5071.7 kiloqram yaş barama təhvil verilib. Hazırda tədarük davam edir və rayon üzrə builki məhsul hədəfi 7200 kiloqramdır.