Yaponiyanın “Tet İnternational Development” şirkətinin törəmə müəssisəsi olan “Zaqatala AGRO Industry” MMC tərəfindən respublikamızın şimal-qərb bölgəsinə daxil olan Zaqatala, Qax və Şəki rayonlarında tütün əkini kampaniyası başa çatıb. Builki mövsümdə cəmiyyət tərəfindən həmin rayonlarda 209 hektar sahədə “Virciniya botaniki” növlü tütün əkilib.
Bu barədə AZƏRTAC-ın bölgə müxbirinə “Zaqatala AGRO İndustry” MMC-dən məlumat verilib.
Bildirilib ki, tütün istehsalı ilə əlaqədar cari ildə cəmiyyət tərəfindən şimal-qərb rayonlarında 22 fermerlə müqavilə bağlanılıb. Fermerlərlə bağlanılan müqavilələr üzrə tütün əkilən sahə 149 hektar təşkil edir. Eyni zamanda, şirkətin özü tərəfindən də bu il şimal-qərb bölgəsində 60 hektar sahədə tütün əkilib.
Cəmiyyətdən verilən məlumata görə, təsərrüfatlarda yaşıl tütün yarpağının dəriminə yaxın günlərdə başlanılacaq.