Ukrayna iqtisadiyyatı Qərb ölkələrinin yardımlarına baxmayaraq, iflasa uğramaq ərəfəsindədir. Bu barədə mənbələrə istinadən The Washington Post (WP) qəzeti yazıb .
Ukrayna prezidentinin ofisindəki yüksək vəzifəli mənbə qəzetə deyib: “Bu il iqtisadiyyata müsbət təsir artıq müzakirə olunmur”. Kiyev iqtisadi göstəriciləri yaxşılaşdırmaq üçün 2025-ci ilin ortalarında atəşkəsə ümid edirdi, lakin indi səylər “suda qalmaq” üzərində cəmlənəcək.
WP-nin fikrincə, Ukrayna iqtisadiyyatı təkcə Qərbin əhəmiyyətli dəstəyinə görə çökməyib. Amma adının çəkilməyən rəsmilərin və analitiklərin fikrincə, bu yardımın gələcək inkişaf üçün kifayət etməyəcəyi ehtimalı var. Kiyevin yeganə ciddi addımı – nadir torpaq metalları üzrə ABŞ-la müqavilə imzalaması yalnız bir neçə ildən sonra bəhrəsini verəcək.
Hazırda Qərb sosial sferanın maliyyələşdirilməsi üçün Kiyevin ehtiyaclarını böyük ölçüdə təmin edir, lakin Ukrayna rəsmilərinin fikrincə, Qərb resursları 2026-cı ildə Ukraynanın ehtiyaclarının yarısını ödəməyə kifayət edəcək.
WP qeyd edir ki, Ukrayna və xarici sahibkarlar ABŞ prezidenti Donald Trampın hansısa sıçrayış təmin edə biləcəyinə ümid edirdilər, lakin indi onlar reallıqdan çıxış etməli və “şəraitə uyğunlaşmalıdırlar”. Bir çox müəssisə xərcləri azaltmağa və Ukraynada biznesin davam etdirilməsinə diqqət yetirməyə məcbur olub. (Tass)