Ölkəmizdə səfərdə olan Mərakeş Krallığının media nümayəndələri Nizami Gəncəvi adına Milli Azərbaycan Ədəbiyyatı Muzeyini ziyarət ediblər.
Muzeydən AZƏRTAC-a bildirilib ki, Beynəlxalq əlaqələr və dünya muzeyləri şöbəsinin elmi işçisi Natəvan Bağırova qonaqlara muzeyin yaranma tarixi, ekspozisiya zalları və nümayiş olunan nadir eksponatlar barədə ətraflı məlumat verib. Həmçinin ziyarətçiləri Nizami Gəncəvi irsi və ümumilikdə klassik Azərbaycan ədəbiyyatının nümayəndələrinin yaradıcılığı ilə tanış edib.
Ziyarət zamanı “Morocco World News”, “Zamane”, “Al-Alam”, “Le Matin”, “Hespress”, “Al Ahdath Al Maghribia”, “Maroc Hebdo” və “Le360” kimi nüfuzlu media orqanlarının təmsilçiləri muzeyin ekspozisiyasında sərgilənən Azərbaycan mətbuat tarixini əhatə edən xüsusi guşə ilə tanış olublar.
Mərakeşli jurnalistlər, həmçinin muzeyin ekspozisiyasında Azərbaycan mətbuatının keçdiyi inkişaf yolu barədə məlumat alıblar. Media nümayəndələri Azərbaycan mətbuat tarixinin zənginliyini və milli-mədəni yaddaşdakı yerini əks etdirən qəzet nüsxələri, maarifçi yazıçı-jurnalistlərin şəxsi əşyaları ilə tanış olublar. Onlar belə bir mədəni ocağın həm ədəbiyyatın, həm də ictimai fikrin inkişafında əhəmiyyətli rol oynadığını qeyd ediblər.