Fransa prezidenti Emmanuel Makron bildirib ki, Paris və Londonun Ukraynaya yardım göstərmək üçün yaratdığı “istəklilər koalisiyası” Avropanın Kiyevi tərk etməyəcəyinə işarədir.
“Bu koalisiya avropalıların heç vaxt Ukraynanı tərk etməyəcəyinə dair siqnal verdi”, – Makron Britaniya parlamentindəki çıxışında deyib.
Onun sözlərinə görə, Fransa və Britaniya “davamlı sülhə nail olmaq üçün atəşkəs və sonrakı danışıqlara çalışacaqlar”.
Makron və Böyük Britaniyanın baş naziri Keir Starmer Fransa liderinin krallığa səfərinin son günü, iyulun 10-da London yaxınlığındakı Northwood aviabazasında “istəklilər koalisiyası” görüşü keçirəcək. Almaniya kansleri Fridrix Merz və İtaliyanın baş naziri Giorgia Meloni də videobağlantı vasitəsilə iştirak edəcəklər.
Bundan əvvəl Rusiyanın Böyük Britaniyadakı səfiri Andrey Kelin TASS müxbiri ilə söhbətində bildirmişdi ki, Britaniya-Fransa istəklilər koalisiyasının yaradılması layihəsi Kiyevin daha bir dost klubuna çevrilib və bundan sonra bu layihə ətrafında həyəcan sönüb. (Tass)