Elm və Təhsil Nazirliyi Botanika İnstitutunun əməkdaşları biologiya elmləri doktoru, professor Dilzarə Ağayeva, kiçik elmi işçi Aytac Əliməmmədova-Hüsüyeva və Ukrayna Milli Elmlər Akademiyası M.G. Xolodnı adına Botanika İnstitutunun əməkdaşları biologiya elmləri doktoru, professor Nina Bisko, biologiya üzrə fəlsəfə doktoru Nadia Mitropolska və elmi işçi Nina Qurinovçin həmmüəllif olduğu “Azərbaycanda bəzi ksilotrof bazidiomisetlərin kulturalarında antimikrobiyal fəaliyyətlər” (“Аntimicrobial activity in cultures of some xylotrophic basidiomycetes from Azerbaijan”) adlı məqalə nüfuzlu jurnalda çap olunub.
İnstitutdan AZƏRTAC-a bildirilib ki, azərbaycanlı və ukraynalı mikoloqların birgə apardığı tədqiqatların nəticəsi olaraq ərsəyə gələn məqalə “Scopus” və “Web of Science” bazalarına daxil olan “Ukrainian Botanical Journal” nəşrində dərc olunub. Məqalədə “Laetiporus sulphureus”, “Phellinus igniarius” və “Pleurotus ostreatus” növlərinə aid bir neçə ştamın Qram-müsbət və Qram-mənfi bakteriyalara (“Bacillus subtilis”, “Staphylococcus aureus”, “Escherichia coli”, “Klebsiella pneumoniae” və “Pseudomonas aeruginosa”) qarşı antimikrob fəaliyyətləri öyrənilib.