AZƏRTAC-ın “Mən turist olsaydım” rubrikasının növbəti reportajı Bakının mərkəzində yerləşən bir neçə ünvana – Əlövsət Quliyev, Bəşir Səfəroğlu, İslam Səfərli və digər ətraf küçələrə həsr olunub.
Həmin küçələrdəki zövqlə bəzədilmiş eyvanlar, nostalji aynabəndlər, divarlarda əks olunan bədii rəsmlər və əl işləri məkanın vizual zənginliyini artırır. Şəhər mədəniyyətinin ən gözəl çalarlarını və sakinlərin estetik zövqünü oxşayan küçələr paytaxtın görkəminə gözəllik gətirir, yerli sakinlərlə yanaşı, turistlərdə də unudulmaz təəssüratlar oyadır.
Yerli sənətkarların fırçasından çıxan divar boyamaları dəniz mövzusundan tutmuş milli naxışlara qədər geniş spektri canlandırır. Küçələrdə gəzərkən rəssam fırçasından qoparaq divarlarda əks olunan kəpənək təsvirləri ilə qarşılaşır, az sonra isə köhnə bir evin üzərində rəmzi güllərlə bəzədilmiş darvazaya diqqət kəsilirsən. Hər detal bir duyğunu çatdırır, hər naxış bir xatirəni oyadır.
Əl işləri ilə dolu kiçik suvenir dükanları, açıq havada təşkil edilən mini sərgilər, küçədə səslənən canlı musiqi xoş mənzərə və ovqat yaradır. Burada sənət canlıdır- hiss olunur, yaşanır və paylaşılır.