Bakı Dövlət Universitetinin (BDU) rektoru Elçin Babayev Özbəkistanın Jurnalistika və Kütləvi Kommunikasiya Universitetinin rektoru Şerzodxon Kudratxoca ilə görüşüb.
BDU-dan AZƏRTAC-a bildirilib ki, görüşdə iki qardaş ölkənin universitetləri arasında mövcud əlaqələrin inkişaf perspektivləri, xüsusilə jurnalistika və media sahəsində qarşılıqlı tədris və tədqiqat imkanları müzakirə olunub. Əsas diqqət ikili diplom proqramının işə salınması və bu istiqamətdə praktiki addımların müəyyənləşdirilməsinə yönəlib.
Rektorlar universitetlər arasında tələbə və müəllim mübadiləsinin təşkili, birgə layihə və tədbirlərin keçirilməsi, media sahəsində ixtisaslaşmış kadr hazırlığının gücləndirilməsi barədə razılığa gəliblər.
Tərəflər yaxın zamanlarda qarşılıqlı səfərlərin davam etdirilməsi və konkret fəaliyyət planının hazırlanması barədə razılığa gəliblər.