Dövlət Gömrük Komitəsi Tibbi Xidmət İdarəsinin rəisi Ceyhun Məmmədov beynəlxalq səviyyədə tanınan və innovasiyalara əsaslanan “Novartis” farma şirkəti ilə əməkdaşlığın əhəmiyyətindən, gələcəkdə bu əməkdaşlığı genişlənəcəyindən, birgə layihələrin xəstələrin məmnunluğuna və səhiyyə sisteminin inkişafına töhfə verəcəyinə bəslənilən inamdan bəhs edib. Qeyd olunub ki, Mərkəzi Gömrük Hospitalının tibbi potensialı, yüksək ixtisaslı mütəxəssis heyəti və qabaqcıl texniki imkanları beynəlxalq əməkdaşlıq layihələri üçün əlverişli zəmin yaradır.
“Novartis” farma şirkətinin Qazaxıstan nümayəndəliyinin brend menecerləri Daulet Suleymenov və Vlada Emelyanova çıxış edərək şirkətin qlobal miqyasda innovativ tibb sahəsində əldə etdiyi uğurlar, müasir müalicə protokollarının hazırlanması, nadir və xroniki xəstəliklərin müalicəsində qabaqcıl yanaşmalar haqqında ətraflı məlumat veriblər. Onlar bu əməkdaşlığın yalnız müalicə sahəsində deyil, klinik tədqiqatlar və tibbi təcrübə mübadiləsi kimi vacib istiqamətləri də əhatə edəcəyini bildiriblər.
Şirkətin layihə meneceri Xumar Bağırova “Azərbaycanda Dövlət Gömrük Komitəsinin Tibbi Xidmət İdarəsinin Mərkəzi Hospitalı ilə gömrük əməkdaşlarına lipid profilinin skrininqi üzrə layihə” mövzusunda təqdimatla çıxış edərək layihənin məqsədləri, əhatə dairəsi və gözlənilən nəticələri haqqında ətraflı məlumat verib.
Görüş zamanı Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi Rəşad Mahmudov, Dövlət Gömrük Komitəsi Tibbi Xidmət İdarəsinin rəis müavini İsmayıl Əfəndiyev, Mərkəzi Gömrük Hospitalının rəisi – baş həkim Bəxtiyar Musayev, rəis müavini Nabil Seyidov, kardioloq Günay Hətəmova, damar cərrahı Səbuhi Dadaşov təqdim olunan layihə və gələcək əməkdaşlıq imkanları barədə rəy, təklif və fikirlərini söyləyib, gələcək planlar və perspektiv istiqamətlər üzrə fikir mübadiləsi aparıb və birgə fəaliyyətin möhkəmləndirilməsi məqsədilə atılacaq konkret addımları müzakirə ediblər.Azərtac.