Fələstinin HƏMAS hərəkatı İsrail işğalının davam etdiyi və Fələstin xalqının hüquqlarının tam bərpa olunmadığı müddətcə tərksilah etməyəcəyini təsdiqləyib. Bu, HƏMAS-ın silahı yerə qoymağa hazır olması ilə bağlı “bəzi KİV-lərin ABŞ prezidentinin xüsusi nümayəndəsi Stiven Vitkoffa istinadən yaydığı xəbərlər”lə bağlı hərəkatın rəsmi Teleqram kanalında dərc edilmiş bəyanatda deyilir.
“Bir daha bildiririk ki, müqavimət və onun silahları işğal davam etdiyi müddətcə milli və qanuni hüquqlarını müdafiə edəcək. Bu hüquq beynəlxalq konvensiyalar və normalar tərəfindən tanınır və milli hüquqlarımız, ilk növbədə paytaxtı Şərqi Qüds olmaqla, tam suveren, müstəqil Fələstin dövləti qurmaq hüququ bərpa olunana qədər bu hüquqdan imtina etmək olmaz”, – mətndə vurğulanır. (Tass)