Ermənistan hökuməti Ermənistan və Azərbaycan liderlərinin sülh müqaviləsi bağlamaq niyyətlərini elan etmək üçün ABŞ-da mümkün görüşü barədə xəbəri təkzib etməyib.
“Biz baş nazir [Nikol] Paşinyanın ABŞ-a gözlənilən səfəri ilə bağlı mətbuatda və sosial şəbəkələrdə yayılan məlumatları nə təkzib, nə də təsdiq edə bilərik”, – hökumətin mətbuat xidməti Ermənistan İctimai Televiziyasının “Lurer” proqramına bildirib.
Eyni zamanda Ermənistan Nazirlər Kabineti xatırladıb ki, ictimaiyyət bu səviyyəli səfərlər barədə vaxtında məlumatlandırılır və “belə bir bəyanat verilmədikcə, bu, təsdiqlənmiş sayıla bilməz”.
“Hazırda, bildiyiniz kimi, biz heç bir rəsmi açıqlama dərc etməmişik, ona görə də xahiş edirik ki, səfərlə bağlı məlumatı yalnız rəsmi açıqlamadan sonra təsdiqlənmiş hesab edəsiniz”, – hökumətin şərhində deyilir.
Bir müddət əvvəl Vaşinqtonda yaşayan qafqazlı jurnalist Aleks Rafoğlu X sosial şəbəkəsində bir neçə mənbəyə istinadən məlumat vermişdi ki, ABŞ prezidenti Donald Tramp cümə günü Ağ Evdə Ermənistan və Azərbaycan liderləri Nikol Paşinyan və İlham Əliyevi qəbul etməyi planlaşdırır. Onun sözlərinə görə, Bakı və İrəvan bu həftə Vaşinqtonda sülh sazişi bağlamaq niyyətlərini bəyan etməyə hazırdırlar. (Tass]