ABŞ prezidenti Donald Tramp hərbi və iqtisadi zorakılıq yolu ilə Tehrana öz şərtlərini tətbiq etməyə çalışmaqla İranın nüvə proqramı ətrafında yaranmış böhranın həllinə nail ola bilməyəcək. Bu fikri Xarici Siyasət Tədqiqat İnstitutunun baş elmi işçisi Leon Hadar “The American Conservative” jurnalında dərc olunan rəy yazısında bildirib.
“Prezident Donald Trampın yanaşmasındakı aşkar ziddiyyət sərt sanksiyaların birbaşa danışıqlarla birləşməsidir. [Bu paradoks] diplomatiyanın nə qədər effektiv işləməli olduğuna dair tam anlaşılmazlığı göstərir”, – o deyib.
Hadarın sözlərinə görə, Amerikanın İranın nüvə obyektlərinə zərbələri Vaşinqtonun danışıqlar prosesində mövqeyini gücləndirməyib, əksinə, kompromis həll yolunun axtarışını çətinləşdirib. Sanksiya təzyiqinin daha da gücləndirilməsi çətin ki, İranı öz mövqeyinə əhəmiyyətli dərəcədə yenidən baxmağa məcbur edəcək, çünki İran iqtisadiyyatı son onilliklər ərzində məhdudiyyətlərdən yan keçməyə uğurla adaptasiya olub.
Ekspertin fikrincə, ABŞ İranın nüvə proqramı ilə bağlı yeni razılaşmanı yaxınlaşdırmaq üçün İrana qarşılıqlı güzəştlər və sanksiyaların yüngülləşdirilməsi təklif etməlidir. “Vaşinqton təzyiq göstərməklə [Tehranın] təslim olmasına nail olmaq kimi qeyri-real ideyadan əl çəkərsə, danışıqlar uğurlu ola bilər”, o, yekunlaşdırıb. (Tass)