Vaşinqtonda Ermənistan, Azərbaycan və ABŞ liderləri arasında əldə olunan razılaşmalar təkcə ölkənin deyil, bütün regionun sabitliyinə təhlükədir. Bu barədə Ermənistan Xarici İşlər Nazirliyinin keçmiş yüksək rütbəli məmurları tərəfindən yaradılan Ümumerməni Diplomatlar Şurasının bəyanatında deyilir.
“Bu sövdələşmə təkcə Ermənistanın deyil, həm də artıq öz etirazlarını bildirmiş böyük regional güclərin maraqlarını təhdid edir. Belə bir razılaşma yeni geosiyasi bölgü xətləri yaratmaq təhlükəsi yaradır və yaxın gələcəkdə yeni qarşıdurma və münaqişələrə səbəb ola bilər”, – bəyanatda deyilir.
Keçmiş yüksək rütbəli diplomatlar hesab edirlər ki, “Trump Road” layihəsi “həyati vacib infrastrukturu və tranzit marşrutlarını xarici aktorların təsirinə məruz qoyaraq Ermənistanın strateji müstəqilliyinə ciddi zərbə vuran müddəaları ehtiva edir”. “Həyata keçirilən prosedurların Ermənistanın suverenliyi və yurisdiksiyası altında işləyəcəyi ilə bağlı iddialara baxmayaraq, dövlətin ərazi bütövlüyü və uzunmüddətli həyat qabiliyyəti ilə bağlı haqlı narahatlıqlar var”, – bəyanatda deyilir.
Ümumaməni Diplomatlar Şurası da hesab edir ki, bu “müqavilə sülhə yol açmaya bilər, əksinə, davam edən qeyri-sabitliyə və Ermənistanın suverenliyinin daha da zədələnməsinə töhfə verə bilər”. “Biz qəti şəkildə inanırıq ki, regionda davamlı sülh yalnız bütün tərəflər, istər yerli, istərsə də regional, ləyaqətli, əhatəli və ədalətli həlldə səmimi maraqlı olduqda mümkündür. Təcrid, məcburiyyət və ya aldatma üzərində qurulmuş istənilən sülh uğursuzluğa məhkumdur”, – diplomatlar hesab edirlər.