Respublikanın ən böyük taxılçılıq rayonlarından olan Ağcabədidə yüksək məhsuldarlığa nail olunub.
Ağcabədi Dövlət Aqrar İnkişaf Mərkəzinin bitkiçilik sektorunun baş mütəxəssisi Ramiz Quluzadə AZƏRTAC-ın bölgə müxbirinə bildirib ki, 2025-ci ildə rayonda 34 min 749,9 hektar sahədə taxıl becərilib. Onun 20 min 971,7 hektarı buğda, 13 min 776,2 hektarı dən üçün arpadır. Ağcabədili fermer və torpaq mülkiyyətçiləri zəmilərdən 154 min 314 ton məhsul əldə ediblər. Toplanmış məhsulun 100 min 192 tonu buğda, 54 min 122 tonu arpadır. Hər hektarın məhsuldarlığı orta hesabla 44,4 sentner, o cümlədən buğda sahələrində 47,8 sentner, arpa sahələrində isə 39,3 sentnerdir.
Hazırda rayonun təsərrüfatlarında payızlıq dənli bitkilərin səpini üçün yay şumunun qaldırılması davam edir. İndiyədək təsərrüfatlarda 27 min hektar sahədə şum aparılıb.