Azərbaycan Milli Elmlər Akademiyasının (AMEA) “Elm” nəşriyyatında “Azərbaycançılıq məfkurəsi” adlı biblioqrafik göstərici işıq üzü görüb.
AMEA-dan AZƏRTAC-a bildirilib ki, “Konstitusiya və Suverenlik İli”nə həsr olunmuş kitabın elmi məsləhətçisi və “Ön söz”ün müəllifi AMEA-nın prezidenti akademik İsa Həbibbəyli, tərtibçisi “Elm” nəşriyyatının direktoru filologiya üzrə fəlsəfə doktoru Səbuhi Qəhrəmanov, redaktoru isə AMEA Rəyasət Heyəti Elm və təhsil şöbəsinin müdiri, filologiya elmləri doktoru, dosent Sərxan Xavəridir.
Biblioqrafik göstəricidə azərbaycançılıqla bağlı müxtəlif illərdə çap edilmiş kitablar, dissertasiyalar, avtoreferatlar, məqalələr və s. haqqında məlumat sistemli şəkildə toplanılıb. Burada materiallar illər üzrə, əlifba sırası ilə verilib. Nəşr XX əsrin əvvəllərindən etibarən milli ədəbi-ictimai fikirdə əsas yer tutmuş, müstəqillik illərində isə Azərbaycan tarixində ilk dəfə olaraq dövlət ideologiyası səviyyəsinə qaldırılmış və dünya azərbaycanlılarının milli-mənəvi birliyinin rəmzi olan azərbaycançılığa, eləcə də “Konstitusiya və Suverenlik İli”nə dəyərli töhfədir. Azərbaycan, rus və digər xarici dillərdə materiallar toplanmış bu göstəricidən istifadəni asanlaşdırmaq məqsədilə köməkçi aparat tərtib olunub.
“Azərbaycançılıq məfkurəsi” biblioqrafik göstəricisi elmi tədqiqatçılar və geniş oxucu kütləsi üçün nəzərdə tutulub.